五星体育评论员　　娄一晨

　　话说昨日中午10点左右，娄指导正在家中聚精会神地观看美国职业冰球联赛斯坦利杯总决赛的直播(今天是第一场)，有友人突然来电！

　　友：喂，侬醒了伐？晓得广州恒大准备开新闻发布会伐？

　　我：啊？啥情况？

　　友：马云准备收购恒大俱乐部一半呃股份，大概12亿人民币！

　　我：真啊？介爆炸啊？格么许家印算解套了咯？

　　友：哈哈哈，侬老兄覅介促狭好伐？稍微拨人家一眼正面点呃评价好伐？

　　我：呒没呀？我第一反应就是许老板终于解套了！侬算算看，从2010年1个亿收购广州俱乐部开始，到去年恒大双冠王，特别是亚冠冠军，伊许老板4年里厢掼下去呃钞票差勿多就是介许多！所以侬讲讲看，阿是一枪头解套？再讲了，能够一枪头解套，难道弗是老正面呃评价吗？

　　友：哈哈哈，侬结棍呃！照侬呃讲法，许家印算是正式解套，格么马云呢？算正式套牢？

　　我：呵呵，迭个我勿晓得，只好去问人家马老板了。反正中国足球搞了介许多年数，大家侪晓得是一只烧钞票呃无底洞，只看见一个个老板用自家主业里赚的来呃钞票往里厢掼，侬看到过有啥人讲自家俱乐部是赚钞票呃？当然咯，假使许老板感觉烧了有眼吃力了，想寻人家来继续烧当然OK！只要伊寻得着就好！反过来，只要马老板感觉蛮新鲜呃，蛮好白相呃，每年烧忒几个亿自家没啥烧勿起呃，格么尽管烧！且烧且开心嘛……

　　友：唉，兄弟啊，勿作兴呃！侬哪能好迭能介开坏人家？再哪能，人家还算是为中国足球探索一条道路呀……

　　我：朋友，我啥地方开坏伊拉了啦？只是讲两句老实闲话呀，对伐？呒没错，许家印马云强强联手对中国足球、中超联赛绝对是一针强心针，但是我相信伊拉两介头绝对清爽光靠俱乐部肯定是做勿过来呃！肯定是想其他办法，走其他路子赚钞票再来烧！

　　友：迭个弗是换汤弗换药吗？一个老板烧勿动了，调另外一个来烧，再烧勿动又要再调一个？

　　我：哈哈，格记是侬开坏人家了哦……不过，目前来讲就是迭能样子，呒办法呃……中超联赛现在除忒冠名赞助啊、场地广告啊、球衣广告啊之类，呒没别呃增长点来……靠票房？侬一张票子好卖到几钿？侬弗可能平均票价500块一张伐？

　　友：侬哪能弗讲电视转播版权啦？国外迭一块是俱乐部最大呃收入！

　　我：哈哈哈，晓得侬要问我转播版权呃事体！格么阿拉捺英超来比较好伐？从去年8月份，就是刚刚结束呃赛季开始，英超三年呃电视版权，伊拉叫全媒体版权，全世界总共卖出去55亿英镑！调成中超联赛，侬觉着好卖多少？阿拉捺货币单位调忒，再捺全世界调成全中国，侬觉着5.5亿人民币有伐？还有一点，哪怕英超现在抢钞票抢成迭能样子，伊拉有几支球队是赚钞票呃？

　　友人默然……

　　放下电话，娄指导突然想起了20多年前红遍大江南北的一首“神曲”——阿里，阿里巴巴，阿里巴巴是个快乐的青年！哦，哦，哦，哦，芝麻开门，芝麻开门！